Te Wiki o Te Reo Māori: He tuatahitanga te tū a te hīkoi mō te reo ki ngā rori o Whanganui
Mō te wā tuatahi i ngā tau 51 o Te Wiki o Te Reo Māori, kua tū te hīkoi mō te reo Māori ki ngā rori o te pokapū taone o Whanganui.
Kua aukati Te Kaunihera-ā-rohe o Whanganui i ētehi o ngā rori kia haumaru ngā kaitautoko o te kaupapa, ā, ko te whāinga nui he whakanui i te reo me te orangatonutanga mō ngā whakatupuranga e haere ake nei.
I whakamārama te kaihautū o te hīkoi, a Raewyn Harrison, i te hirahiratanga o te whakatairanga i te reo."Ka kaha rongona te reo Māori, ka kaha kitea te reo Māori, ka whakanake ake te iwi, te hapū te whānau i te reo Māori."
"Toitū te whenua whatungarongaro te tangata. Ki au nei ahakoa whakatungangaro te ngā kairangapū, te kāwantanga me o rātou ture engari ka tū te reo mō ake ake ake" heitā Harrison āno.
I takoto hoki ngā kōrero a Paora Heremia nō Ngā Reo O Te Arepa mō te hononga ki te rohe me te kotahitanga o te hapori. "I roto i tēnei o tēnei takiwā o Whanganui ake e mea ana te kōrero: 'toitū te kupu, toitū te reo, toitū te mana."
"He kauapapa tēnei e whakakotahi ai tātou te iwi Māori, āe, mō te reo māori, āe, engari e whakakotahi te hapori katoa o Whanganui otirā ngā hapori katoa o runga anō i tēnei whenua ake” e ai ki a Heremia āno.
I whai whakaaro hoki a Karleen Marshall nō Te Kura o Tawhero ki te orangatonutanga o te reo i roto i ngā kura me ngā tamariki mokopuna. "He hirahira rawa atu tēnei kaupapa, ko te reo Māori te reo tuatahi o tēnei whenua nā reira me whakamana mātou i tō tātou tino taonga ko te reo Māori."
"Me kaha koke whakamua tātou ki te whakatō i te reo Māori i roto i ngā kura katoa ahakoa ngā mahi mīharo o ngā kura kaupapa Māori me ngā kura-ā-iwi kei ngā kura auraki a tātou tamariki mokopuna Māori, nā reira kia kaha tātou" heitā Marshall āno.
Comments