KU TOA WHAKAIHUWAKA TE KURA O KOKOHUIA I TE WHAKATAETAE KAPA HAKA MŌ NGĀ KURA TUATAHI O WHANGANUI.

Neke atu i te 400 ngā tauira i hui mai ki te whakaatu i ō rātou pūkenga, i tō rātou ngākau nui hoki ki te kaupapa o Ngā Manu Kōpara – te Whakataetae Kapa Haka Kura Tuatahi o Whanganui.
He kaupapa whakahirahira tēnei ka tū ia rua tau, hei whakanui i ngā pūmanawa me ngā whakatutukitanga o te rangatahi mā roto i te kapa haka.
I whakapuaki a Cataleya Auē, te kaitātaki kōtiro o Te Kura o Kokohuia, i tōna harikoa whai muri i te pānuitanga kua eke tōna rōpū ki te tūranga tuatahi.
“He harikoa, he āhua ohorere, engari he tino harikoa ahau, he tino harikoa ia me mātou katoa.”
I eke a Te Kura Kaupapa Māori o Te Ātihaunui-a-Pāpārangi ki te tūranga tuarua, ā, ka noho koia te kura tuarua kua whai wāhi ki te whakakanohi i a Whanganui ki te whakataetae ā-motu o Mana Kuratahi, ka tū ki Whāngārei hei te marama o Noema 2027.
He tino kaupapa whakahirahira te ekenga ki ēnei tūranga mō ngā rōpū kapa haka, he hua hoki tēnei nō ngā marama maha o te whakapau kaha, te ū ki te kaupapa me te whakapau werawera.
I whakapuaki hoki a Huia-Rose Hales, te kaiako o te rōpū tuakana o Te Kura o Kokohuia, i ōna kare ā-roto, arā, te whakahī me te ngenge whai muri i tā rātou whakaaturanga whakahirahira.
“Inaianei tonu kua pau te hau, engari e harikoa ana nā runga i ngā tutukitanga nui a ngā tauira, a ngā tamariki o tā mātou kura ake. Āe, kua pau te hau, engari hurō, kua tutuki!”
I tua atu i te whakataetae, i kōrero ngā kaiwhakarite mō te hiranga o te whakatū atamira motuhake mā ngā tamariki, kia whakareia ake ai te kounga o ā rātou whakaaturanga.
I whakamārama a Sharnarose Pehi, te kaiwhakahaere o te kaupapa, i te hiranga o tēnei paetae.
“Tēnei kaupapa, he kaupapa whakahirahira mō ā tātou tamariki.
Koinei te wā tuatahi kua riro mai i a tātou he atamira mō ā tātou tamariki. I te nuinga o te wā, ka tū noa rātou ki runga i te papa. Nō reira, he mea nui te kohi pūtea hei tautoko i tēnei kaupapa.”
I whakanuia hoki e Rawiri Tinirau, te kaiwhiriwhiri matua, te kaha o te reo Māori me te tuakiri Māori i kitea i runga i te atamira.
I tāpiri atu ia, i whakaatu te kaupapa nei i te hōhonutanga o te here ā-whakapapa o te rangatahi ki ō rātou tūpuna, mā roto i te waiata me te whakaari.


Comments