top of page

E whakarite pai nei ngā tamariki o Te Kura Kaupapa Māori O Manawatū mō tō rātau tū ki te whataarangi Ko Whiri Tika Mai whakataetae ā rohe o Manawatū/Horowhenua.

Writer: Phoenix Manley-Green
Phoenix Manley-Green
6 days ago
2 min read

E whakarite pai nei ngā tamariki me ngā kaiako o Te Kura Kaupapa Māori O Manawatū mō tō rātau tū ki te whataarangi o Ko Whiri Tika Mai, te whakataetae kapa haka ā-rohe o Manawatū/Horowhenua.



Kua roa te kura e whakahauhau ana i ngā tauira me te whakarite i te kapa, ā, hei tā te pouako haka tā Rawinia Kaiwai-Paterangi, kua rite katoa ngā mahi mō tēnei terenga.


 “Kua tino āio ngā whakaritenga mō tēnei terenga, āe, ngāwari noa i tēnei wā.”


He kaupapa nui tēnei ki te takiwā me te rohe me te whakatairanga i ngā taonga a ngā tūpuna. 


Hei tā Rawinia anō, he whai wāhitanga whakamīharo tēnei mō te reo me te reo Māori i te rohe. “Ko te mea nui kia whakatairangatia te oha a kauwheke mā, me te mīharo hoki te kite i tērā tatauranga o ngā kura e tū ana ki tēnei o ngā rohe.”



Hei tā Philip Ratima, tētahi o ngā pouako haka o te kura, he nui te aro me te uaua o ngā mahi whakaako me te whakarite waiata, engari ko te whāinga matua kia harikoa ngā tamariki i runga i te ātāmira.


“Tā ia waiata, he kaupapa rerekē, tā ia waiata, ētahi he mihi, ētahi he wero, heoi anō ko te kaupapa matua, ko te mea matua mō ā tātau tamariki kia tū rātau, kia poho kererū te āhua, kia harikoa rātau i roto i ngā mahi katoa.”


Hei āwhina i te hunga tamariki me te kapa, e hiahia ana ngā kaiako kia whakapau kaha te hunga mātua me te hapori katoa ki te tautoko i a rātau. 


Hei tā Philip, “Ko te karere nui pea kia tautoko nuitia ā tātau tamariki, me te mea nei e mōhio pai ana te katoa nei ēhara tēnei mahi i te mahi ngāwari, nā reira āe, ko te āki nui ki ngā mātua kia tautoko noa.”



Ahakoa he nui ngā wero o te ako me te whakarite kapa haka, kei te whakapau kaha te kura katoa me ngā kaiako. 


Hei tā te pouako tā Brooke Saggers-Nepe, “E tino manawanui ana ngā kaiako katoa ki ō rātau mahi, koinei te wā kia whakapau te kaha, waiho te kaha ki runga ki te ātāmira, anō hoki kei konei te kura e whakapau kaha ana ki tō rātau nei taha.”


I runga i tērā, e mihi ana hoki a Brooke ki ngā hapori me ngā whānau e tautoko ana i ngā kaupapa katoa e hangaia ana e te kura me ngā akonga hei whakarite i ngā tamariki mō tēnei tū takiwā.


Comments


bottom of page