Te Whakanuinga o Puanga: He Whakakotahitanga o ngā Iwi o Tokomaru Waka

Ngā uri o Ngāti Maru, Ngāti Tama, me Ngāti Mutunga

I ngā rā tata nei, i whakanuia e ngā iwi o Tokomaru Waka te taenga mai o Puanga ki te marae o Pukearuhe. 

He wā tēnei mō te wānanga, te karakia, me te whakawhanaungatanga i waenga i a Ngāti Maru, Ngāti Tama, Ngāti Mutunga, me Te Atiawa.

I kōrero te kaiwhakahaere a Te Amoroa Clifton mō te hiranga o tēnei huihuinga, me tana harikoa ki te kitenga i te kotahitanga o ngā iwi. 

“Koange te ngakau i te mea kua tae mai i a Ngāti Maru, Ngāti Tama, Ngāti Mutunga ki runga i tēnei kaupapa, i ngā rā kua pahure ake nei, arā, ā, ko te whanaungatanga i runga i tēnei kaupapa o Puanga”

Pukearuhe Marae, Ngāti Tama

He wā āno hoki tēnei mō te hōhonutanga o te wānanga me te karakia.

“Kia kōrero tahi, kia wānanga tahi ko tēnei mea ko Puanga, te tuku atu i ngā mate ki te whata o Maru me te harikoa āno rā i te mea ko tēnei te tahi o te tau”.

E aro nui ana tēnei kaupapa ki ngā akoranga tikanga me ngā karakia o Puanga e hāngai pū ana ki te hunga taiohi o Te Tai Hauāuru.

“Ko ētahi e taiohi tonu, nō reira rā ka pū te ruha, ka hao te rangatahi i tērā whakataukitanga kōrero rā, nō reira ko te tupuranga, ana ka kite atu rā i runga i tēnei kaupapa ko ngā tupuranga, ngā rangatahi e ahu mai nā i runga i tēnei kaupapa, i runga i ngā mahi rite nei mā tātou ngā iwi”.

Te Hautapu me Te Hatuku o ngā uri o Tokomaru Waka

I whakanuia hoki e ia te āhua o te mahi tahi i waenga i ngā iwi ki a whakatū i tēnei hautapu me te hautuku. 

“Te ātaahua hoki a ngā kaikaranga, ngā kairukuku i runga i te mea e mahi tahi ana ngā iwi ko Ngāti Mutunga, ko Ngāti Tama, ko Ngāti Maru i runga i tēnei kaupapa”

“Ko tēnei te hautuku me te hautapu, arā, e wānanga tahi ana, e kōrero tahi ana mō te karakia me ērā o ngā herenga ki ngā atua, ki ngā whetū i te rangi, ā, me te mōhio āno rā ki ngā āhutanga o tēnei taha o te motu ko te Tai Hauāuru me ngā ritenga e hāngai pū ana ki a Puanga, ki a Matariki”.

Te Hautapu me Te Hautuku o ngā uri o Tokomaru Waka

I toro a ia i ōna wawata mo ngā uri o Tokomaru waka ki ngā whetū, ki a Hiwaiterangi hei whakatūwera i te tau hou Māori mō ēnei iwi.

 “Ko ōku wawata mō ngā uri o Tokomaru waka, kia anga whakamua, ki a noho tahi, ki a wānanga tahi, kia ora pai ai ngā ritenga, ngā karakia, ngā ruruku, ngā whakawai, ēra katoa i roto i a tātou:”

Te Hautapu me Te Hautuku o ngā uri o Tokomaru Waka

Mā tēnei mahi tahi, ka pūmau tonu ngā taonga tuku iho o ngā iwi mō ngā whakatupuranga e haere ake nei.