Ka whakakanohi a Te Pārekereke o Rangiātea me Te Tira Haka o Ngāruahinerangi i a Taranaki ki Te Mana Kuratahi 2027
Kua puta te ihu a te kapa o Te Pārekereke o Rangiātea nō Te Kura Kaupapa Māori o Te Pihipihinga Kākāno i Te Huihuinga o Ngā Tātarakihi.
Ko rātou tahi ko te kapa i tae tuarua mai, a Te Tira Haka o Ngāruahinerangi nō Te Kura o Ngāruahine, ka whakariterite ki te eke atu ki Te Tai Tokerau mō te whakataetae-ā-motu a Te Mana Kuratahi ā te tau 2027.
I kōrero te kaiako a Bonnie Maxwell mō te harikoa me te powhiri a tana kapa i muri i te wikitoria, “Ehara i te mea e tū whakahīhī ana engari kua waimarie tātou kua whai wāhi, kua whai tūranga ki te haere ki Te Mana Kuratahi ki Te Tai Tokerau.”
I kōrero anō ia mō te whakapau kaha o ngā tamariki i ngā marama i mua i te eke ki te atamira, “E toru marama kua whakapau kaha ēnei tamariki kia tū ki te atamira, e hikaka rawa rātou.”
I whakaatu a Matehaere Totorewa i ōna kare-ā-roto mō te tutukitanga o tō rātou rōpū, “He rawe, he harikoa, he maha aku kareāroto i tēnei wā engari e tino harikoa.”
I whakanui hoki ia i te mahi me te hihiri i uru ki ngā whakawhiu parakatihi, “I tino pai i parakatihi ia rā, ia rā. I āhua hōhā engari i tutuki ngā mahi.”
I te taha o ngā kaiwhakawā, i kōrero te Kaiwhakawā Matua a Tamzyn Pue mō te kounga reo me ngā ihi i kitea i tēnei tau, “I kite ai mātou ngā kaiwawao ko te kounga o te reo tētehi o ngā mea matua, koirā i kounga ai tēnei tau.”
I whakawhiwhia hoki e ia ēnei kupu āki mō ngā kapa e rua ka whakakanohi i te rohe o Taranaki.
“Kia ū kia pumau kia purutia ki tō tātou reo te reo o Taranaki, tō tātou mita kia Taranaki te tū, kia Taranaki te karawhiu i a kupu rāua ko kōrero ki mua i te whakamenega ki mua hoki i ngā iwi o te motu kia pupuri tonu rātou i ngā taonga a tō tātou tauheke maunga a kuia mā a koro mā.”
Comments