Ka pū te rūhā, ka hao te rangatahi: Ka kawea e Pikiteora Matehaere ngā reo o te hunga rangatahi ki poari matua o Te Korowai o Ngāruahine.

Kua ara ake he reanga kaiārahi hou ki Te Korowai o Ngāruahine, i te whakatūnga o Pikiteora Matehaere hei māngai mō ngā hapū o Tamaahuroa me Titahi.
E mōhiotia ana ia ko Piki, ā, i te 21 tōnā pāhake , ko ia te mema poari pōtiki rawa atu mai i te whakatūnga o te poari i te tau 2013.
He tohu nui tēnei mō te iwi, e whakaatu ana i te whakapono ki te kaha me te pitomata o te rangatahi.
E ai ki a Piki, ko tāna kaupapa matua he whakarite kia rangona te reo o te hunga rangatahi, otirā ko rātou ngā tāngata ka pāngia e ngā whakataunga mō tō rātou anamata.
Ka ahu mai tōna hiahia i tōna hononga ki te hapori me tana whai wāhi ki ngā kaupapa mō te hunga rangatahi Māori o Ngāruahinerangi.
“Ko tōku hiahia kia rangona te reo o te rangatahi. Kua ū pū ahau ki tō tātou ūkaipō, arā, ko te wāhi haumaru mō te rōpū rangatahi Māori o Ngāruahinerangi,” hei tāna.
“Ko tōku whāinga nui, he kawe i ngā whakaaro me ngā reo o ngā rangatahi katoa puta noa i Ngāruahinerangi, tae atu hoki ki te rohe whānui o tō tātou maunga.”
I mihi te Tumu Whakarae o Te Korowai o Ngāruahine, a Te Aorangi Dillon, ki te whakatūnga o Piki, me tana whakanui i ngā wheako me ngā mātauranga ka kawea mai e ia ki te poari.
“Kei ngā tōpito katoa o te motu nei a Pikiteora e mahi ana i ngā mahi e pā ana ki te whare wānanga, ā, ko ia tētahi o ngā raukura o ngā kura kaupapa Māori o tēnei takiwā,” hei tā Dillon.
I kī anō a Dillon, e whakaatu ana te whakatūnga o Piki i te whakapono o Ngāruahine ki tōna reanga rangatahi me tō rātou āhei ki te kawe i ngā mahi ārahi me ngā mahi whakahaere.
“Kei te kite mātou e whakapono ana a Ngāruahine ki ā rātou rangatahi, ā, e mōhio ana ka taea e rātou ēnei momo mahi,” hei tāna.
He tohu anō hoki tēnei whakatūnga mō te hiranga o te mahi ngātahi a ngā reanga.
E ai ki a Te Ahu Rei, he mema poari o mua nō Ngāti Tū, kua roa ia e kōkiri ana i te kaupapa kia whai wāhi mai te hung rangatahi ki ngā poari.
Hei tā Rei, me whai wāhi ngā rangatahi ki te tēpu whakatau kaupapa, ahakoa te iti o ō rātou tau, o ō rātou wheako rānei.
“Kua roa nei au e kōkiri ana i tēnei kaupapa, arā, te whakaaro kia kuhu mai te rangatahi ki runga i tēnei poari,” hei tāna.
“Ahakoa he tamariki tonu, he rangatahi tonu, he taiohi tonu rātou, nō rātou tēnei ao. Nō koutou tēnei ao.”
I whakatenatena hoki a Rei i te iwi whānui kia whakatuwhera i ngā kuaha mō te hunga rangatahi, kia whai wāhi ai rātou ki te whakapuaki i ō rātou ake whakaaro i te taha o ngā kaiārahi.
Hei tāna, he mea nui te whakawhitiwhiti whakaaro i waenganui i ngā reanga.
“Kei konei te rangatahi, e hiakai ana ki ēnei mātauranga, nō reira, horahia te tēpu kia hākari tahi ai tātou,” hei tāna.
“Me noho te rangatahi me te pakeke ki te tēpu kotahi, kia whakawhitiwhiti whakaaro ai tātou.”
Mō Piki, he nui te haepapa kei runga i a ia i tana urunga ki te poari, engari kei mua tonu i te aroaro ko te reo o te hunga rangatahi.
E whakaae ana ia he nui ngā mahi kei te haere ake, engari ka noho tonu ngā reo me ngā wawata o te hunga rangatahi o Ngāruahine hei aronga matua māna.
“Kei te mōhio au he nui tēnei haepapa, ā, he nui ngā mahi kei mua i te aroaro. Heoi anō, ko ngā rangatahi o Ngāruahine kei mua i ahau. Ko tāku he kawe i ō rātou whakaaro me ō rātou reo,” hei tāna.
Ko te whakatūnga o Piki hei mema poari he ara whakamua mō te whai wāhi nui ake o te rangatahi ki te waihanga i te anamata o tō rātou iwi.

Mā konei e rangona ai ngā tirohanga o te reanga hou, i te taha tonu o te hunga kua roa e kawe ana i ngā mahi ārahi.
Mā te noho tahi o ngā reanga, te whakawhitiwhiti mātauranga me te whakarongo ki ngā whakaaro hou, ka kaha ake te tū a Ngāruahine mō ngā rā kei te heke mai.



Comments