Te Whakaaturanga o te Hīkaka o ngā Taiohi o Taranaki ki Te Koroneihana

Kua rongo te ao i te reo o ngā rangatahi o Taranaki i a rātou i tae atu ki Te Koroneihana tuarua o Te Arikinui Ngāwai Hono i te Pō. 

https://youtu.be/hT17v955I-w

He kaupapa hirahira tēnei mō Te Kura Kaupapa Māori o Te Pihipihinga Kākāno Mai I Rangiātea me Te Kura o Ngāruahinerangi, i a rātou e whakanui ana i ngā hononga ki Waikato.

Ko Waiaio Chapman tētehi o ngā tauira i kōrero mō te hirahira o tēnei wheako. I kī ia, “Ko tētehi o ngā pāinga e tae mai tātou ki konei ko te wheako, wheakohia tēnei kaupapa nui a Tainui otirā a tātou te iwi Māori.” 

I tua atu i tēnei, i whakanui a ia i te mana o te Kuīni Māori mō te hunga taiohi. 

“He tino pai te kite i tētahi, me kī, taiohi tonu e tū ana hei māngai mō tātou te iwi Māori koia e mauria mai ana ōnā whakaaro rangatahi... he pai mā mātou koia hoki te kuini o tō tātou anamata.”

I whakaae hoki a Herengārangi Wharehoka ki te hirahira o te hononga ki a Tainui. 

“He momo kaupapa whakahirahira tēnei te tū rangatira ki te taha o Tainui, te noho tā mātou hononga ki Tainui waka hoki. Ko te noho piri ki ngā piringa kaha maha me ngā kura kē atu,” i kī ia. 

I kōrero hoki ia mō te tū o te Kuīni hei kaiārahi mō te anamata: “He rangatahi tonu ia, ēngari he pai ia mō te anamatā, ana hoki mō tātou Ngāi Māori, me ō mātau pīpī paopao kia whai tonu i a ia.”

Ko te Tumuaki, ko Moana Kake-Tuffley, i whakamārama i te take i tae mai ai ngā tauira ki konei. 

“I puta te karanga i tō tātou Arikinui kia huihui katoa mai ngā iwi o te motu ki konei ki runga i a ia otinoa e whakarite i a tātou taiohi ki rite mō Te Matatini o ngā taniwhā,” tāna i kī ai. 

I whakatau ia i te kaupapa mā te kī: “Kei konei ki te whakakanohi i ngā āhuatanga e wawatahia nei tō tātou Arikinui mō ā tātou tamariki te take nā reira mēnā e hīkoi ngātahi ana mātou ngā ohinga i tō tātou Arikinui ka rongo tātou i te mouri i ērā hononga ki tō tātou Kuīni.”