Te Kāhui Maunga: Te Kotahitanga me te Whakanui i te Koroneihana 2026
I te wā e tū ana a Te Kāhui Maunga ki te atamira o Te Manawa Toki Tuu i te Koroneihana 2026, he tohu kaha tēnei o te kotahitanga me te kaha o te hononga ā-iwi.
Kua huihui mai ngā uri o te Kāhui Maunga ki te whakahoki i te karanga a te Arikinui, a Kuini Ngā Wai Hono i te Pō, mō tōna koroneihana tuarua.
E ai ki a Tamzyn Pue nō Taranaki Maunga, i takea mai tēnei kotahitanga i te tono a te Arikinui. Hei tāna, “Nā runga anō i te tono o tō tātau Arikinui kuini ngā wai hono i te pō i pupu ake te whakaaro i a ia kia tū kotahi ngā rohe whānui ngā rohe katoa o te motu whānui nōreira ko tāku nei ko te whakatinana tō tātau arikinui i tōna tupuna tauheke a tawhiao e mea ake ra, ki te kotahi te kakaho ka whati ki te kapuia e kore e whati.”
Ahakoa te hiahia kia kotahi te reo, he taimaha te ngākau o te rōpū i te matenga o ō rātau rangatira, inā rā, a Papa Te Ikamatawhero Rauru Broughton.
Ka whakamārama a Tamzyn i te uaua o tēnei wā: “Mō TKM whānui tonu, he uaua rawa atu tēnei tā te mea i tērā Rāhororangi, arā, te Rātapu i nehua a Papa Rauru nōreira kua kawea mai rā e TKM whānui tonu i tō mātau pou tikanga o te kāhui, arā, a Papa Rauru kei te ngau a roto, kei te tangi tonu ki a ia engari kua tae a tinana mai i runga i te mōhio hei tā parps, ko te whakakiki i ngā whāwhārua ahakoa rā me tae atu, ahakoa te aha ahakoa pouri ahakoa ngau kino nei me haere koutou ki mua i te aroaro o tō tātau arikinui.”
I te wā e whakarite ana mō tēnei kaupapa, e kore e warewarehia ngā pou o te iwi kua riro atu. Hei tā Elijah Pue nō Whanganui: “E tangi tonu ana te ngākau i te rirohanga atu o tō tātau pou tikanga Te Ikamatawhero Rauru Broughton oti noa te kawe hoki i a Raymond Kaiki ētahi o ngā pou o TKM i roto i ngā tau e tangi tonu ana engari harikoa ana kei te whakanuia rāua e te motu ki konei ki te koroneihana me te honore nui te kawe mai i ngā rau mharatanga o ērā pou o tātau.”
E ai ki a Elijah, he take hōhonu tēnei tū kotahi o te rōpū.
“E tika ana kia tū kotahi a TKM nā runga katoa i ēnei hononga poropiti nei heoi ano, kia mama ake ngā whakaritenga mō waikato, kia noho tahi, kia tū tahi a TKM me ngā iwi maha o reira titiro mai ki nui o te tangata kua tae mai i tēnei pō ki te whakanuia i a tātau anō heoi, ki te whakaatu atu i ngā hononga i waenganui o TKM nei ki te ao ki waikato anō hoki.”
I te taha wairua, e whakapono ana a Te Taepa Kameta nō Te Iwi Mōrehu, kei ngā tikanga tawhito te whakautu. “Kei roto pea i ngā waiata kei roto pea i ngā tongi nga kupu whakaari te whakautu i tenei mea i te kotahitanga e tino whakapono ana ko tenei te ara tika mo tatau. Ko te arikinui e arahi i tona iwi maori ko tumuaki manuao e arahi ana i nga moreghu ki te taha wairua i tenei haerenga ngatahi.”
I a ia e whakatakoto ana i te kaupapa mō te hunga rangatahi, ka akiaki a Te Taepa kia mau ki ngā taonga a ngā tūpuna. “Kia mau ki nga taonga o nga tupuna ko te taiaha ko te mau patu ko te tewhatewha me enei taonga hei kawenga ma koutou, hei arahi i a koutou hei awhiina ma koutou i roto i to koutou hikoitangaki te ao hou. Koira te kupu a ratana ki te hunga rangatahi kotahi rautau neke atu a e iri tonu ana era korero noreira me whakaoreorehia era korero hauhakehia era korero heo ohakitanga mo o tatau rangatahi i enei ra.”
Comments