He Maimai Aroha: Kua arahina a Te Ikamatawhero Rauru Broughton i tōna Kāhui Maunga ki Te Kāhui Ariki.

Kua paea a Te Ikamatawhero Rauru Broughton ki te onetapu, ā, kua tae mai te tini me te mano ki te kawe i te mamae me te tangi mohoa noa nei ki mua i te aroaro o Te Arikinui Kuini Ngā wai hono i te pō.

https://youtu.be/lNPByeBTZDQ

I te huihuinga nei, i kōrero mai a Mark Pirikahu o Ngā Rauru Kītahi mō te hiranga o te whai i ngā tikanga me te tautoko i te whānau: “Kei konei ki te whai i ngā tīkanga o kui mā, koro mā, kia haere ngātahi ki runga i Te Arikinui Kuini Nga wai hono i te po, i te rangi nei, tātau katoa te motu e tangi hotuhotu nei.”

I kōrero anō hoki a ia mō te whakarite i te whānau me te pouaru: “I a mātau e whakarite ana i te Pouaru me ōna tamariki, kia haere ngātahi i waenganui i te tokopae te whai atu i te kaupapa, nei he nohonga waimārie.”

Nā Elijah Pue o Te Kāhui Maunga i whakakōrero te pouri o te rohe i te matenga o tētahi pākeke arataki: “E tangi tonu ana i te rirohanga atu o tō tātau pou tikanga o Te Kāhui Maunga, oti nō, nāna anō tātau i arahi i roto i ngā tau nā reira e tika ana me kawe mai i tōna whakaahua ki runga ki tōna marae, ki mua i te aroaro o tōna Kuini.”

I tapiri atu hoki ia i ēnei kupu mō te hunga kua tae mai i te Tai Hauāuru: “Ko ngā waka maha o Te Tai Hauāuru tēnei kua tatū mai ai ki te mihi ki tō tātau Arikinui a Kuini Nga wai hono i te po oti nō ki te kawe i ngā mate tāruru nui o Aotea, o Tokomaru, o Kurahaupō waka anō hoki.”