Kua rītaia tētehi poutokomanawa o ngā kura kaupapa Māori o Taranaki whai muri i te 35 tau i te ao mātauranga.

Neke atu i te 200 tāngata i hui atu ki Kanihi Māwhitiwhiti Pā ki te whakanui i te whakatānga o Ngapera Moeahu, tētehi o ngā kaihāpai Kura Kaupapa Māori o Taranaki.

https://video.wixstatic.com/video/d32b94_7a1338f0bb30429b84eb4caecdcf4789/1080p/mp4/file.mp4

Pūrongo nā Te Raunatanga Whakaara, Multimedia Reporter Taiuru News.

Kua ngahuru mā whā tau a ia e tū ana hei tumuaki mō Te Kura o Ngāruahinerangi, ā, he 35 tau kua whakapau kaha a ia ki te ao mātauranga. Nā wai, nā wai, kua mutu tana mahi hei tumuaki, ā, kua waiho e ia tētahi taonga tuku iho nui mō Te Kura o Ngāruahinerangi.

Hei tā Moeahu ehara māna te mihi nui, ko te whānau me te hapori kē.

“Nei ko kore te whānau hei whakahaere i tō tātou nei kura, kua kore he kura.” 

Ko tā te Heamana Whānau o Mua a Renee Wright, ko Moeahu te tino toki.

“Ki te kore a Ngapera kua kore māotu e tutuki i ēnei kaupapa katoa, na, me mārama te iwi ki tērā nā te mea he nui āna mahi.”

I tana tū hei tumuaki, i ū tonu a Moeahu ki te whakapakari i te mana o Ngāruahinerangitanga me te reo Māori i roto i te kura. Nāna i ārahi kia noho tonu te kura hei kura e whakahaerehia ana e te whānau, e ū ana ki ngā tikanga me ngā uara tuku iho. I a ia e whakaaro ana ki tana haerenga me ngā wawata mō anamata, i mea ia:

"Ko taku tino wawata, kia toitū tonu te reo o Ngāruahine, me ngā tikanga me ngā uara i tuku iho mai e ō tātou kuia, e ō tātou koroua."

Nā tana kaiārahi i tupu ai te kura kia taea ai e ngā ākonga te whai mātauranga tae noa ki te tau 13, me te pupuri tonu i ngā uara ahurea i whakapau kaha ia ki te whakatō.

I a te hapori e anga whakamua ana, e kitea tonutia ana te hua o tana kaiārahi.

I whakaputa ngā ākonga, ngā raukura me ngā kaiako i tō rātou tino mihi mō tana manaaki, tōna arataki, me tana tautoko i roto i ngā tau. Hei tā tētehi o ngā tauira, he tā Maraea Weston, ko Moeahu tō rātou pou reo Māori, tō rātou pou poi manu. 

“He maha ngā pūkenga o Whaea Ngapera, ko tōnā tino pūkenga ko te mahi poi manu me ngā waita tawhito, rāranga, hanga poi.”

I a ia e tuku ana i te rākau ki te reanga hou, kua waiho e Moeahu tētehi kura kua pakari ake, me tētehi taonga tuku iho ka toitū mō ngā whakatipuranga e heke mai nei. Ko āna kōrero whakamutunga, ehara tana toa i te toa takitahi, engari he toa takitini.

“E tino mihi nui tenei au ki te whānau te tuatahi ki ngā kaiako. Ko rātou te tino, ko rātou te kāhui o te kura i akiaki ngā tamariki ngā mokopuna hoki, ehara ko au noaiho.”